【頭條獨家】單拖行家品店 陳慧琳買杯好苦惱

社會運動加上肺炎疫情，娛樂圈好多人冇工開，不過對半退休狀態嘅陳慧琳(Kelly)冇太大影響，係兩個仔唔使返學，佢喺屋企會忙啲。日前下晝4點，着到好靚，拎住個名牌靚袋嘅Kelly戴住口罩現身又一城Zara Home，佢主力睇杯，揀咗好耐，仲要不斷拎住個杯放喺啲床冚隔離，疑似攞嚟襯，見佢都好苦惱，其實個床冚都係799蚊，買埋囉。採訪:譚壹致

喺搜尋新聞網Wise打陳慧琳三個字，新聞好少，最近期嘅係同鍾楚紅慶祝60歲生日，但同工作無關唔算數，要數工作就要去到去年12月，Kelly出席哈爾濱冰雪大世界錄影跨年晚會，當時室外氣溫零下26℃，佢要著住羽絨長裙表演，新聞報道咁樣寫，「佢唱歌時開口噴白煙，被取笑似「加濕器」，更凍到表情失控好趣怪。」

諗過度過先好買
當日，唔使點做嘅Kelly獨自去Zara Home，見佢一入店就去睇杯，對110蚊一隻嘅啡色杯最有興趣，睇完又睇，拎遠咁睇又拎近咁睇，仲將啲杯放喺泥土色床冚隔離，可能Kelly屋企嘅床上用品多用泥土顏色，所以想襯返。見佢為咗兩隻杯諗咗好耐，都係110蚊一隻啫，兩隻都係220蚊，有用咪買囉。最後，諗咗近半個鐘，Kelly帶住兩個杯返歸。