【頭條獨家】母子關係如朋友　榮文蔚約囝囝行街食飯

名媛榮文蔚（Yvette）去年辭任天機公關董事一職，榮休後的生活依舊多姿多采，不時做慈善工作及文化交流，惟近日新冠肺炎疫情嚴峻，一切社交活動急煞停，大家都減少出街。2月尾， Yvette就同兒子阮永謙及其朋友去尖沙咀行街食飯，其間呢位「潮媽」帶3位年輕人去網紅店打卡，眾人仲傾得好開心，足見兩母子感情好深厚。採訪：張詠森

榮文蔚榮休後繼續活躍社交圈，除了出入Ball場、做吓慈善及藝術工作外，又周遊列國去玩，得閒又約名人好友Fine Dinning， 享受人生。之前就見到Yvette同囝囝阮永謙到K11 Musea行街，同行仲有囝囝嘅兩個同學仔。當日，穿連身短裙Tee、露出半邊香肩的Yvette先獨自逛潮店，其間主要睇男裝，估計打算幫囝囝添置新裝，未幾，警覺性勁高的她已發現記者在場，隨即一邊Send短訊一邊行去網紅餐廳Camellia，再會合其餘3人食飯。

囝囝去倫敦讀大學
在餐廳逗留約半個鐘，眾人食飽便繼續Shopping，跟Yvette餅印一樣的永謙，轉眼已經18歲，一企起身仲高過媽咪！雖然生得大大隻，但永謙依然好黐Yvette，兩母子邊行邊密密斟，之後在商場兜了一圈，他們又到1樓的YumMee買嘢飲，Yvette叫咗杯Bear Bear果汁梳打，3個小朋友就陪坐和吹水，大家仲打成一片，傾到哈哈笑！事後問Yvette，佢透露當日囝囝約朋友傾去倫敦升學的事宜，日後她都會英港兩地飛探對方。對於新冠肺炎疫情嚴重，她說：「𠵱家出街都會小心啲，盡量保持清潔、揀少人去嘅地方，希望疫情快啲過去啦。」