【頭條獨家】拍劇唔受33D劉芷希誘惑蕭正楠娶到翠如係人生最好嘅事

2020-02-05 19:16

由張兆輝主演嘅無綫新劇《黃金有罪》去到中段，劇情愈來愈緊湊，劇中輝哥同姚子羚有Kiss戲，洪永城又先後跟陳瀅、人妻陳自瑤及李璧琦有親熱戲！至於蕭正楠喺劇中人才兩失好落泊，幸而監製王心慰安排暗戀他的紅牌舞女，馬來西亞演員劉芷希（Kimmy）為親近他，着住火紅色三點式坐喺他身邊陪燒烤，大晒33D導彈上圍！阿蕭強調拍該場戲時目不斜視，更乘機向愛妻黃翠如發表愛的宣言：「娶到呢個太太係我人生最好最好嘅一件事！我好開心呀，即使婚前都變身『絕緣體』啦。」採訪：方騫平髮型：Will@Hairculture

蕭正楠在新劇《黃金有罪》中處境好悽涼，剛好跟現實事業、家庭兩得意相反，他坦承近11年生活美滿：「當年簽TVB前去咗北京發展咗幾年，感覺好迷茫，真係有諗過轉行，但諗唔到可以做乜！呢11年好似坐緊人生過山車咁，啟發到一個人最重要有把握心態，就算跌緊落去谷底都係一種鍛練嚟，因為冇落過去又點知上返去嘅開心呢！我用呢個心態去接受起伏，經歷過高低，所以變得好平常心，受壓程度都會大好多。」

未有生育大計

講到黃翠如，阿蕭讚到老婆上天。「翠如係個開心嘅人，佢對我幾大改變，互相影響對方，佢學習我優勝嘅嘢；我吸收佢身上我冇嘅嘢，大家一路成長，娶到呢個太太係我人生最好最好嘅一件事，我好想照顧佢。我哋會互相鼓勵，早排有人抨擊佢聲線同演技，我會戥佢難過，因為佢係好用心做戲，可能睇開佢旅遊節目嘅觀眾，一時難以投入佢演戲，我會鼓勵佢唔好計較暫時嘅評論，繼續垂下頭做好戲，打後應該會得到觀眾認可。」

至於生B問題，恨到流口水的蕭正楠強調要顧及對方感受，不能太自私，因為對方是事業衝刺期，待下半年兩公婆才認真去探討：「我想佢喺最安心時候先諗生育問題，更何況鄭嘉穎、曹永廉都係好大個先做老竇啫！」