【頭條獨家】自資四十萬出處男碟圓夢張崇基預咗蝕痛得起

2020-02-04 22:00

入行27年，剛「入五」的張崇基跟胞弟崇德以「二重唱」組合形式先後開過10次演唱會及出過5張《Duet》專輯，但原來張崇基從未出過一張Solo碟。最近佢自資40萬推出處男專輯《我的八十年代廣東歌》，挑選咗喺80年代，影響他最深嘅10首歌曲重新演繹，由於限量發售1000張，加埋受經濟環境影響，唱片市道雪上加霜，張崇基預咗蝕住做，好彩有能力痛得起，可以任性去圓夢！採訪：方騫平髮型：Kenji@IL Colpo 場地：Vibe Cafe & Bar

張崇基的HiFi碟《我的八十年代廣東歌》翻唱咗林子祥《幾段情歌》、譚詠麟《愛的逃兵》、林珊珊《把歌談心》等，全部係當年耳熟能詳嘅經典好歌：「其實最初構思出夠3 CD，分別同張崇德一人一張Solo碟，再加二重唱碟，咁樣就可以突顯我哋兩兄弟嘅音樂特質，奈何巿道問題，咁做太重皮而放棄。但又好任性咁想有張個人唱片，就算喺逆市，都堅持要送呢份禮物畀自己。」

名貴大禮贈自己
呢份名貴大禮超過40萬，除咗包裝到好似本厚書仔外，唱片採用DSM音效技術，喺美國製造，歌曲又加入罕有樂器，好似手風琴，要專程由歐洲音樂家錄返嚟，「我問大師要有乜準備嚟配合？佢竟然回答我：『只要準備歐羅，匯錢過去就可以喇！』可幸入行咁多年仲有籌碼，我預咗肉赤，仲痛得起，唔會入晒肉。」另外，喺製作唱片期間發生過小風波：「我做好晒張HiFi碟，先發現《情已逝》同《奔向未來日子》喺歌曲版權上有小小棘手，呢啲係音樂人冇可能犯嘅錯，好彩最後都順利解決到。其實最初原意只係跟志同道合嘅朋友玩吓，冇諗過會成為商品發售，情有可原啦。」