【全港停課】陳茵媺一家沙灘上堂 吳雨霏孭囝囝上山吸新鮮空氣
2020-02-03 15:16 
受武漢肺炎疫情影響，港府宣佈幼稚園、小學、中學延長停課至3月1日，面對突如其來的「長假期」，一眾星級家長都諗盡辦法令小朋友冇咁悶，好似胡諾言太太陳琪就選擇留在家中休息，以及與囡囡一齊整嘢食。
至於去年9月才誕下二女Galilee的吳雨霏（Kary），今日就帶埋1歲大仔Asher和狗仔去行山，呼吸一下新鮮空氣之餘，順便當運動強身健體！不過，相中見她背脊孭住28磅的囝囝，又要拖住一隻金毛尋回犬，你都咪話唔攰！好在Kary之後上載了一條片，片中有個壯漢幫手孭BB，估計老公洪立熙都有同行！她又以英文留言，表示產後因要照顧兩個小朋友，導致身體長期受壓，不過Kary仍樂觀面對，努力去適應身體與升呢媽咪的生活變化。
另一個媽咪陳茵媺（Aimee）昨日則帶3名子女到沙灘玩，實行寓學習於娛樂，她以英文寫道：「學校暫時停課，但我啲小朋友喺附近沙灘玩嘅時候，發現咗一啲有趣嘅方法去繼續學習。」原來3個小朋友用碌竹於沙上學寫字，本來二仔陳浩鋒想寫「陳」字，但Aimee自嘲掛住影相都唔得閒理對方。
關鍵字
最新回應