【頭條獨家】老婆開綠燈想添丁　李丞責為劉倩婷浪漫慶生

2009年港姐冠軍劉倩婷（Sandy）與著名堪輿學家李丞責博士結婚7年，育有一女，多年來兩公婆都十分恩愛，Sandy更不時於社交網放閃晒合照，上月跟陳茵媺夫婦食慶生飯時，她仲坦言羨慕對方3年抱三，自己都好想追多個！一直恨添丁的李丞責見老婆終於開綠燈，日前嗱嗱臨喺中環Book咗間法國餐廳，同壽星女Sandy Sweet爆撐枱腳，乘機醞釀浪漫氣氛！採訪：張詠森

上月24日是劉倩婷的34歲生日，一向圈中人緣甚佳的她先後與好友食飯慶祝，當中包括朱千雪、曹敏莉、陳茵媺與丈夫陳豪等，而踏入凌晨12點正日呢個Moment，梗係留番同身邊最重要嘅人一齊度過啦！在生日前夕（23日），Sandy就跟老公李丞責撇低3歲囡囡李仟辰，乘7人車到中環的文華東方酒店共進晚餐。當晚7點一落車，兩夫婦見到在場記者即滿面笑容，仲應要求企定定影相，心情靚爆，而身為壽星女的Sandy亦明顯悉心打扮過，以黑色See-through衫外搭紅色外套，十分喜慶！

製造小情趣
雖然結婚差不多7年，經已是老夫老妻，但二人依然Sweet到漏，由大門行至Lift口都全程十指緊扣，仲不時互相對望；在等Lift期間，Sandy更翹實李丞責耳語，唔知講咩秘密呢？兩人即時笑到見牙唔見眼，感情好得像熱戀中的情侶，之後他們雙雙笑住入Lift。事後，Sandy於社交網上載相片，原來當晚李氏伉儷上咗25樓法國餐廳Pierre，一邊望住維港夜景一邊Fine Dining，非常浪漫！