【頭條獨家】監製《打天下》沖繩拍外景 歐錦棠呻未天光拍到天黑
2020-01-15 02:49 
歐錦棠首度監製及主演、以空手道做主題的ViuTV新劇《打天下》，早前到沖繩拍攝外景，阿棠話因為當地是空手道的發源地，加上當地好多靚景，所以決定拉隊去取景，不過去到當地由於地方大，加上有好多動作場面，為爭取時間拍攝，每日要未天光拍到天黑，好彩台前幕後都好搏，所以在當地完成拍攝他即請大家食餐好。採訪：杜淑霞
阿棠年多前獲ViuTV邀請製作新劇，當時他即想到一個寫落多年的劇本，「呢個本嚟係電影劇本，2010年搵過人投資，可惜唔成事，所以講起有咩故仔可以拍劇，即刻諗起呢個可以攞番嚟變成20集嘅故仔，ViuTV都鍾意個題材。」
大讚談善言
雖然已做過多部舞台劇的監製和導演，但阿棠話當初考慮了很久才答應監製這部劇，「始終未做過電視劇監製，同舞台劇差好遠，但好想挑戰吓自己，好彩搵到好朋友高林豹導演幫手，佢喺內地發展為主，拍過《無心法師》嗰啲劇，好彩佢二話不說就嚟幫手執導，如果我同唔熟嘅導演合作，仲要兼顧埋演真係搞唔掂。」
今次選去沖繩拍外景，阿棠解釋因當地是空手道發源地，加上當地好多靚景，「不過拉隊去拍真係唔容易，加上有好多動作場面，每日未天光拍到天黑，好彩成班演員個個都好搏，特別係女主角談善言，雖然佢完全冇武功底子，但係好吃得苦，就算經常受傷都照頂，所以大家拍得好開心，外景完我都有請大家食餐好，嚟緊都想再同ViuTV合作製作更多劇集畀大家睇。」
關鍵字
最新回應