【古天后日誌】美股今年吸引力仍大於港股

2020年1月2日，多雲，下午部份時間有陽光，天氣都係咁上下。美股喺2019年最後一個交易日續升，總結全年道指、標指、納指分別累計上漲約22.3%、28.9%和35.2%。標指和納指均創自2013年以來最強年度表現；道指以點數計全年累升逾5,000點，係有紀錄嚟首次，難怪最在意美股表現嘅總統侵侵咁牙擦。 至於港股喺2019年雖然處於外憂內患當中，但港股總結仍然錄得升幅，完全漠視所有利淡因素，包括GDP可能錄得顥著衰退，全年恒指仍然進帳2344點，較2018年升9%。之前古天后都提到，當港股愈嚟愈赤化，尤其成份股嘅股份，加入愈來愈多內地企業，港股已唔再反映本地實際經濟情況。 內地人民銀行喺元旦日送大禮，自下周一起下調金融機構存款準備金率0.5個百分點。人行有關負責人表示，今次降準是全面降準，體現逆周期調節，釋放長期資金約8000多億元人民幣，直接支持實體經濟。呢個消息預期會令港股高開，不過暫時恒指喺新加坡黑期市場表現溫和，未見一枝箭咁標上28500點。港股短期將可上試28500至29000點，其後最好有番O的回調打打個底，先有力再向上挑戰。 人行下調準備金率當然有利市場氣氛，但野村首席中國經濟學家估算，內地短期流動性缺口高達2.7萬億元人民幣，主要來自農曆新年前夕傳統流動性需求上升、定向中期借貸便利(TMLF)到期、以及地方政府發行特別債與民間「搶錢」的排擠效應，今次放水8000億亦未必能填補本月流動性缺口。唔知係咪呢個原因，暫時未見港股喺新加坡黑期急升，暫時都只係錄得近百點升幅咁上下。 除O左咁之外，上個月港股已累積唔少升幅，已反映O左中美貿易談判首階段協議簽訂，及人行放水預期，今日人行放水嘅消息，自然對大市唔會有太大刺激。展望2020年古天后對港股睇法較為中性偏好，由於美國總統大選年，睇番往績顯示，喺過去13個大選年裏，港股有11年錄升市，比率接近85%，今年亦唔會差得去邊。 只不過中美貿易談判喺今個月簽訂首階段協議之後，仍有漫長談判道路要行落去，港股好難完全擺脫政治市，而本地社會運動導致經濟增長放緩甚至倒退嘅負面因素，將會進一步浮現，今年即使港股再有進帳，亦未必會錄得太大升幅，能夠重返2018年高位已經唔錯。雖然相對港股目前估計仍然唔算高，但美國大選始終帶嚟不確定因素，資金將傾向流入美元避險，而美國企業今年有望保持增長，衰退風險唔高，美股即使估計略高，但喺美企業續支持下，吸引力對於機構投資者嚟講，仍然大於港股。 古天后 (徐狄怡，證監會持牌人)