開Live憶舊事　J.Arie回味古仔驚喜開金口唱《男朋友》

J.Arie（雷深如）近日獲大大小小品牌邀請做Live show，她亦憶起入行經過和一琴行有關，J.Arie說：「話說我嗰時中六，暪住屋企人參加唯一一次公開歌唱比賽，就係呢間琴行搞嘅。我初賽一下就畀人叮走咗，但竟然有初賽嘅評判搵我開始幫佢唱Demo，由嗰度開始，我就認識到唔同嘅監製，再有機會去夾Band唱唔同嘅商場、婚禮、Band show。」結果唱了大概四、五年後，畢業後獲監製賞識邀做歌手，所以她對這間琴行有好大的情意結！

談到Live期間，有觀眾留言點唱古天樂（古仔）的《男朋友》，J.Arie超驚訝，皆因居然有人記得上年香港電影工作者總會春茗，她與小肥、王梓軒等在台上唱過該曲，身為演藝人協會會長的古仔亦在台下，J.Arie憶述：「其實嗰刻都有啲驚佢會嬲，但古生竟然喺我哋唱到中段嘅時候，上台同我哋一齊大合唱，即刻全場超哄動！因為嗰次真係古生真真正正第一次開金口！事後亦都有唔少人話我哋真係好夠膽，但自此之後，古生都間唔時再開吓金口唱歌！嗰次嘅大膽舉動都可謂係我哋最美好同埋最搞笑嘅回憶！」