爆腹中囡囡扁嘴扭計　許芷熒夫婦溫馨佈置聖誕樹

好快就到聖誕節喇！繼日前高調回港的黃心穎於Instagram（Ig）晒露腿佈置聖誕樹相後，今日輪到懷孕7個多月的前港姐許芷熒（前名許亦妮，Whitney），在Ig上載一段着住短裙仔、挺住巨肚佈置聖誕樹的短片，而片中的Whitney就好溫馨，皆因她有從事印刷生意的老公Alex Fung幫手，仲有老公錫錫，認真幸福滿瀉！她留言：「同一棵聖誕樹，今年佈置的感覺別有一番味道，因為情意更濃，今年多了一個身份和多了一個女兒在肚裏面，下年的今天就有個Santa Kayli @bbfungbobo 陪我地一齊過聖誕！We Can’t Wait！」睇嚟B女「馮寶寶」已經改名為Kayli了！

昨晚Whitney都有在社交網Update馮寶寶狀況，仲公開了自己的巨肚照及兩張囡囡的超聲波照，大爆B女未出世已經擺出一副「扁嘴扭計樣」，她寫道：「今日去做產檢，醫生話@bbfungbobo 馮寶寶3.74磅，而我就重咗18磅。一照3D超聲波，馮寶寶即刻皺眉頭，扁嘴扭計樣，好似知道有人講緊佢咁，好搞笑！」並大讚老公影相技術愈來愈好，還笑稱有信心入產房時，對方幫自己影的相應該見得吓人！