【維港會】搭組合櫃「屋仔床」供外傭瞓? 網民炮轟涼薄

香港樓價高企，基層市民想求一個安樂蝸居都十分困難。有傢俬設計公司在facebook上載一批組合儲物櫃相片，聲稱是「畀工人姐姐在廳睡，好正」，設計引來網民批評離譜。

該傢俬設計公司專頁上載一套由白色組合櫃堆砌成的「屋仔床」，在旁邊有一條樓梯供人爬上爬落，上層的櫃還裝設了一道小百葉門，似供人爬入櫃中躺臥。

到底將睡床和廳櫃二合為一，是純粹宣傳「惡搞」還是真的當「床」推售呢？有網民在facebook問價，公司就回覆「二尺半X六尺$15000」。

如此狹窄的「床位」，引來大批網民留言批評， 「做設計嘅都要有道德嘅！設計以人為本，呢個設計係對用家嘅侮辱！」。有網民就斥「狗屋都無咁慘」。亦有人炮轟僱主， 「僱主冇人牲，地方細可以叫工人同小朋友同房，不是訂個櫃比姐姐瞓」、「香港地方細，有時真係冇計，但都唔好做間狗屋去羞辱人地，人地離鄉別井去搵食已經好慘，咁既設計都可以拎出嚟？」