【頭條獨家】離大台賣生果搵到食 喬寶寶入行13年勁賺千萬

因為under show，本身跟TVB還有一年生約的喬寶寶決定唔再留低，提早於10月離巢，與TVB結束13年多的賓主關係。雖然唔捨得，但成年冇工開都唔係辦法，趁明年4月返蘇格蘭慰妻前，喬寶寶盡力喪賺在港的最後一桶金。日前勤力寶寶拉埋陳蕊蕊去將軍澳厚德街市做sales，力推最新引入的韓國提子，寶寶仲餵蕊蕊食，大讚提子大大粒，又甜又爽似足蕊蕊咁正喎，兩人你一句我一句，話咁快速銷咗幾箱。採訪：方騫平 場地：JC fruit

原來由引入新品種提子到策劃推廣，喬寶寶都有份構思。他坦言少咗大台遮蔭，乜都要「跑數」：「市道真係麻麻，工作量唔多，好彩水果生意幾穩定，都佔咗我一半以上收入，𠵱家唯有行多幾步，諗啲新嘢可以刺激吓經濟，同埋刺激一吓自己個荷包。呢款提子應該係全港獨家，靚水果大家都會食，都有商機嘅，所以就算之後長居蘇格蘭，生果生意都無意撤資，而且大老闆好好，仲答應分多一成花紅畀我。」


蘇格蘭生活無問題
喬寶寶入行前於懲教署任職至二級懲教助理，2005年參加《殘酷一叮》，06年正式入行，他坦言這13年來勁賺1000萬，都算係大豐收：「不過8成收入歸老婆，自己只得兩成，佢儲蓄畀小朋友，亦會畀娘家，我一向唔問由佢發揮啦，反正係多餘錢，咪畀佢囉，有時我有需要用錢問佢拎，佢都唔會問長問短，大家講個信字。不過，我唔打算50歲退休，各大平台第日有嘢做都會返嚟，過到去蘇格蘭好想同喬嫂嫂周圍玩，兼且好想湊孫。最安慰係大仔印度豹Inderpal好勤力，已持有兩個物業，我喺蘇格蘭有經營餐館，三餐飽飯OK嘅，都唔愁下半生。」