【頭條獨家】唔使追仔 城城講到出口好幸福 城嫂方媛招積揈袋行街

17年，54歲郭富城同細佢22年嘅方媛（Moka）結婚，婚後兩年抱兩，分別是兩歲囡囡「大寶」Chantelle及半歲囡囡「二寶」Charlotte，屋企有三條Queen，城城應該好快樂。不過，日前有傳思想傳統的城城欲以名牌手袋加送100萬現金，利誘老婆為佢追仔，對於傳聞，城城嬲豬留下四個字:「妖言惑眾」更強調有兩個女已經好幸福好開心，仲話建立幸福家庭唔係用錢去衡量，總之暫時無再生嘅計劃，老公力撐生女無問題，仲講明無計劃追，32歲嘅城嫂好開心，難怪一個人行街去買珍珠奶茶都揈晒袋，非常招積。採訪:張詠森

城嫂好腳頭，城城早前憑電影《麥路人》在英國奪得「倫敦東亞電影節」的「最佳男主角獎」，名下愛駒「舞士精神」日前再奪冠，城城興奮拖太太方媛拉頭馬，他笑讚愛駒叻仔，勝出是不負支持牠的馬迷眾望，卻提醒馬迷別孤注一擲，賭博不要落重注。

傳出埠「造人」催旺生仔
城城仲話覺得愛駒同自己好似：「兩次出賽所抽檔位都唔好，勝出係好大考驗，能突破困難好似我咁，拍戲、開演唱會都會面對困難，衝破到先有好成績。我鍾意養馬就係欣賞馬有個性同鬥心。」係嘞叻嘞。城城婚後樣樣都好，但有傳郭媽媽恨抱男孫，故兩公婆一直未放棄「追仔」。據知，一直篤信玄學風水的城城，最近獲高人指點，出埠「造人」會催旺生仔運，故早前去英國宣傳電影亦有帶埋Moka同行。

城嫂成身名牌但唔太貴氣
對有傳用一百萬利誘老婆生仔，郭富城以妖言惑眾及荒謬作回應，表示生育小朋友不能用金錢衡量，亦不是買賣，婚姻是一世承諾，如果用錢買到感奇怪。他續說：「照顧兩個小朋友花好多時間，我好忙，太太又有時裝工作，我意願暫時不再生，有兩個女已經好sweet，女有女好，不是那舊思想，有兩個女已經好幸福好開心，暫時冇呢個計劃。」老公力撐老婆，又開到口講家庭生活好幸福，嫩妻方媛應該放下心頭大石。上周四就見佢以一身名牌Gucci加拎住Loewe puzzle bag現身銅鑼灣，一個人嘅城嫂明顯行完街，見佢揈住個袋排隊買珍珠奶茶，等候期間仲好有興致拍片影低沖奶茶過程，由等到拎到珠奶只需幾分鐘，然後就見佢企埋唐樓底邊飲邊等Uber接返歸。