【修例風波】理大外播《四面楚歌》 警喊話：出嚟啦去投降（片段）

理工大學仍有部分示威者拒絕離開，警方連日戒備的同時，還透過揚聲器向校園播應景歌和嗌咪勸降。有警員昨晚便透過揚聲器，向示威者喊話，指「好寂寞、好孤單，喂，唔緊要嘅，出嚟啦，去投降。」

警員接著又指，「喂，其實你哋做咗犯法嘢，淨係計你哋喺理工大學入面嘅刑事毀壞呀，犯罪行為嚟㗎嘛，要埋單㗎，要找數㗎，犯咗法就要伏法，基本嘅嘢嚟㗎啦，食咗嘢要俾錢埋單找數，最基本嘅道理嚟㗎，點解竟然有人希望犯咗法之後，係唔需要承擔責任嘅？咁我嘅存在咪好無意義？

做人唔可以咁自私嘅，知唔知道呀，諗下人哋吖，你整爛啲地鐵，挖爛晒啲路。我都未見過理工大學出面有沙灘嘅真係，真係心裏有沙那裏不是馬爾代夫呀真係。

喂，唔緊要嘅，如果你冥頑不靈嘅，我哋陪你，過完聖誕、過埋農曆年、過埋復活節都陪你嘅。哎吔，但係，當你哋人愈嚟愈少，去投降嘅人愈嚟愈多嘅時候，我哋攻入嚟嘅時候希望你哋唔好反抗喎，知唔知道呀。喂，最後送一首歌俾大家，周杰倫嘅《四面楚歌》。」

除昨日外，警方日前已先後於理大外，播放包括電影《監獄風雲》主題曲《友誼之光》、陳奕迅的《十面埋伏》及李克勤的《告別校園時》等流行曲勸降。

*短片為網止片段