兒子年僅七個月張致恒幾個月後再做老竇

2019-11-19 21:54

張致恒（Steven）今年7月忽然宣佈和未婚妻雯雯誕下一子「天寶」，兩人於今年9月成婚，補辦註冊結婚。昨日雯雯於IG貼出Steven抱着兒子對望的溫馨照，留言暗示再度有喜，寫道：「已經幾日食唔到嘢，咩都冇力做唔到，辛苦你照顧個仔仲要照顧我，辛苦你要將我食完一兩啖嘅嘢食埋佢，辛苦你要一日煮咁多餐畀我食，辛苦你要遷就我嘅脾氣同無理取鬧。仲有幾個月...大家一齊努力堅持埋佢！」Steven即時留言冧妻：「因為你，我真係要好好減肥先得，如果唔係我抱唔到兩個啊，我愛你。」
　　

正當大家仲估估吓，究竟Steven係咪咁強咁生得時，傍晚時終於揭開謎底，Steven在IG承認雯雯再陀B，留言寫：「多謝大家嘅祝福，感謝主俾多一個小孩我哋，其實我同我太太都好鍾意小朋友，天寶又可以多一個細佬或者細妹，我覺得咁樣屋企又熱鬧又開心，所以我會更加努力令到佢哋快樂成長！」網友紛紛留言祝賀，唔少留言大讚他「造人」能力夠強，夠勁：「勁」、「咁快？」，亦有人好言相勸，叮囑他加油：「唔好辜負太太對你嘅愛」、「大個仔要生性喇」、「生生性性」，最搞笑有人叫他「開演唱會出個人大碟」。