【頭條獨家】湊仔煮食主持樣樣掂 陳倩揚獲GiGi姐點名合作
2019-11-19 19:00 
陳倩揚離開TVB四年不乏工作，香港開電視明年的新節目都預埋佢玩，安排她同黃淑儀(GiGi姐)主持重點綜藝節目《揚GI甘露》，用食物連繫兩代關係，仲會探討婆媳、父母子女等兩代關係。據節目及廣告製作總監盧冰心爆料，原來今次由GiGi姐「點燈」，指定搵倩揚拍住上，搞到倩揚受寵若驚，好想知原因。記者及後向休養中的GiGi姐了解，她揭開謎底說：「對倩揚嘅氣質留低一個好好嘅印象。」採訪：方騫平 場地：Barry巧鬆啲工作室(城寨風味)
原來當年陳倩揚曾做過GiGi煮食節目《吾淑吾食》嘉賓，當中兩人提及過育兒方式，雖然係兩代人，但倩揚的一套令GiGi姐好Buy，紀錄在案，如果有機會必再合作，所以撮成好事。倩揚笑說：「我會好努力裝備自己，但當然係會有壓力，好彩我都識煮嘢，但只限於家庭式煮食，相對GiGi姐只係BB班。」
網絡紅媽
最近倩揚做埋網絡紅人，社交網專頁粉絲超過6萬人，媽媽級粉絲最愛追看她半小時速煮營養早餐、仲會同fans交流做巨型麵包心得及貼地生活點滴。她說：「見到留言，有啲媽咪跟住我做，真係有畀老公、奶奶讚都好感動，我都希望帶出感染力啫，咁我都算係一個合格嘅老婆、媽咪同新抱，雖然有時都會同奶奶持唔同意見，但鬼叫鍾意佢個仔，唯有要諗返個尊重位，其實冇話啱定錯，要互相溝通同學習，兩代互補。」
最新回應