【發奮自強】曾被叫中國豬 向佐拍片自豪是中國人

一直想成為功夫演員的向佐公開了一段6分鐘的短片，片中的他開首已表明「身為中國人而感到自豪」，出生於香港的向佐跟大家分享一段往事，「13歲去咗英國一間寄宿學校讀書，住第二晚已經畀十幾個同學用枕頭打，佢哋想話我知，佢哋唔歡迎皮膚唔同顏色嘅外人。第二日，有高年班師兄叫我去執樹枝同洗碗，我問點解？佢話:『因為你係中國豬。』」

向佐第一次感受到歧視覺得好唔開心，「未出國前，以為自己是香港人，原來喺國外，我就係中國人，身為中國人，對民族有一份強烈感情。」因為民族感情的推動力，向佐決定要做一啲嘢，佢留意到整個英國都喜歡 Rugby，「我為咗玩Rugby，唔理落雪定落雨都不停練，有日教練終於發現我有進步，有一次仲安排我落場處理罰球，嗰刻我只有一個信念，就係『向前衝』，最後隊友讚我做得好，亦開始被尊重。」

因為呢件事，再無人叫向佐做中國豬，亦再無人蝦佢，佢仲搵到自己方向。出生在香港的向佐立志成為功夫演員，「因為香港除咗係世界最重要嘅金融中心，亦係最自由嘅國際城市，同埋功夫電影嘅發源地，我想通過呢個專業，去延續同發揚我哋民族不屈不撓嘅精神，對國家民族同家人，血脈相連嘅感覺一樣，係自然嘅歸屬感。」

說畢即插入歌曲《東方之珠》，向佐最後重申，「我通過我嘅言行，我嘅努力，以最適合自己嘅方式去表明身為中國人嘅自豪。」最後畫面有兩行字，「願憑着我們每一個香港人的努力，還原這顆東方之珠的光芒。」