【頭條獨家】拖友衣着大不同 厚褸龐景峰VS熱褲女友晒腿

郭秀雲和錢小豪嘅兒子龐景峰(Andrew)，自從與細5年嘅瘦削女友Peggy蜜運後，不時連體放閃。日前晚上，Andrew又與女友仔去銅鑼灣撐枱腳食台灣嘢。見二人十指緊扣離開時溫馨吹水，不過呢pair拖友衣着卻好唔同，男方穿上毛領厚褸；女方就小背心熱褲，大晒青春本錢。踏入初秋，夜晚小心貪靚冷親呀！
採訪 : 梁志明

29歲嘅龐景峰，今年4月被控無牌駕駛及沒有第三者保險而使用車輛兩罪，兩項控罪判60小時社會服務令及停牌一年。無得揸車遊車河，Andrew就多咗同24歲女友Peggy去銅鑼灣用腳拍拖嘞！繼早前兩小口子喺時代廣場門口被本報影到溫馨放狗，日前晚上撇下愛犬二人世界，就拖到實去白沙道嘅台灣餐廳撐枱腳。

搞到女友扁嘴
不過近日夜晚涼浸浸，見大隻仔Andrew出街都要加返件厚褸，反觀另一半愛靚唔愛命。化晒妝嘅纖瘦Peggy，僅穿上紅色小背心配白色熱褲，置身秋裝打扮嘅人群中，寧舍搶眼。二人食完dinner，再在附近閒逛，見已着返件外套保暖嘅Peggy在一間精品店睇髮夾、吊飾等，Andrew就去買果汁。未幾，大隻仔折返「湊女」走人，見佢捉住女友手，催促對方行，Peggy唯有扁嘴無癮跟男友離開。