【頭條名人】酒莊開婚前派對 陳鈺芸恨生女要求老公食素

「打女」陳鈺芸（JuJu）早前與荷里活導演男友司徒永華（Anthony）在美國洛杉磯結婚，剛回港工作的她表示，婚宴高潮是她和老公及兄弟姊妹一齊跳舞娛賓。過程中最難忘是一眾好友帶她到三間酒莊開婚前派對，由朝飲到晚好開心。由於有很多世界各地的親友前往觀禮和飲宴，所以一對新人搞咗個Local Tour帶賓客四圍遊覽。問到造人大計？新人妻表示下個月會去南非渡蜜月睇動物大遷徙，待明年一月拍完電影後就會開始造人，希望先追個鼠女。撰文：李佩儀

出嫁當日，JuJu開心稱除了搵到全洛杉磯唯一一架老爺Benz接載出入外，又能在玻璃教堂行禮絕對是夢想成真。她覺得婚禮最有趣的地方是美國人結婚，新郎婚前唔可以見到新娘着婚紗，否則會唔好運，所以JuJu行禮前不斷要避嚟避去，「老公同啲兄弟去影相，我同姊妹就要去另一邊影。」問到婚禮上有無喊？她笑言：「有吖，繞住爸爸聽住琴聲行入教堂已經想喊，入場後見到啲舊同學同好多好耐冇見嘅朋友就忍唔住，原來Anthony企喺度等我時已經喊咗出嚟，最搞笑係佢見我喊得咁勁，用番佢抹眼淚嘅紙巾幫我抹。」

先生女再生仔
由於有好多來自世界各地的親友前往觀禮和飲宴，JuJu特別搞咗個Local Tour帶他們去荷里活地標和天文台參觀，又安排了高檔中餐給司徒家族的親戚品嚐。講到最難忘就是一眾好姊妹帶她到三間酒莊開婚前派對，既可品酒，又可參觀釀酒過程，還收到姊妹們送贈、有點兒童不宜的「小情趣」禮物。提到造人大計，她直言：「因為明年一月要開拍功夫戲，可能要拍埋先，或者中途『開工』都得嘅。」目標是生完小JuJu再生小Anthony湊成個「好」字，她聽說男性多食菜較易生女，現已要求老公全素食，希望一擊即中！