【头条独家】拖友衣着大不同 厚褛庞景峰VS热裤女友晒腿

郭秀云和钱小豪嘅儿子庞景峰(Andrew)，自从与细5年嘅瘦削女友Peggy蜜运后，不时连体放闪。日前晚上，Andrew又与女友仔去铜锣湾撑枱脚食台湾嘢。见二人十指紧扣离开时温馨吹水，不过呢pair拖友衣着却好唔同，男方穿上毛领厚褛；女方就小背心热裤，大晒青春本钱。踏入初秋，夜晚小心贪靓冷亲呀！
采访 : 梁志明

29岁嘅庞景峰，今年4月被控无牌驾驶及没有第三者保险而使用车辆两罪，两项控罪判60小时社会服务令及停牌一年。无得揸车游车河，Andrew就多咗同24岁女友Peggy去铜锣湾用脚拍拖嘞！继早前两小口子喺时代广场门口被本报影到温馨放狗，日前晚上撇下爱犬二人世界，就拖到实去白沙道嘅台湾餐厅撑枱脚。

搞到女友扁嘴
不过近日夜晚凉浸浸，见大只仔Andrew出街都要加返件厚褛，反观另一半爱靓唔爱命。化晒妆嘅纤瘦Peggy，仅穿上红色小背心配白色热裤，置身秋装打扮嘅人群中，宁舍抢眼。二人食完dinner，再在附近闲逛，见已着返件外套保暖嘅Peggy在一间精品店睇发夹、吊饰等，Andrew就去买果汁。未几，大只仔折返「凑女」走人，见佢捉住女友手，催促对方行，Peggy唯有扁嘴无瘾跟男友离开。