【頭條獨家】陪大肚好友貼地搭巴士 Fit媽陳嘉寶傳授湊仔經

29歲嘅青春人妻陳嘉寶（Anjaylia），唔經唔覺其寶貝女Hosanna已9個月大嘞！所以呢位fit爆媽咪開始放心撇下囡囡，早前陪丈夫短線遊台灣後，日前下午又跟好友gathering。當日下午，見齊蔭Anjay和大肚婆女友行銅鑼灣，之後搭巴士趕返炮台山寓所，接老公仔更湊女。十分鐘車程中，Anjay滔滔不絕，似係向好友傳授湊仔經囉！   採訪 : 梁志明

陳嘉寶17年同拍拖4年嘅初戀男友黃頌祈結婚，翌年懷孕，今年1月誕下可愛B女Hosanna。生完似未生過嘅Anjay，身材得天獨厚，窈窕好fit。早排，佢被本報影到黐實大隻仔老公黃頌祈，去銅鑼灣一間連鎖手機店整電腦。之後兩公婆就飛咗轉高雄，齊齊喺社交網誌po相，穿上黑色情侶裝暢遊蓮潭滑水主題樂園。

日前下午4時，叉完電返港嘅Anjay容光煥發現身銅鑼灣。見佢當日相約一位大肚好友行街街，大肚姊妹個肚籮咁大，目測已懷孕逾7個月，臨盆在即係時間搵靚媽咪Anjay取湊仔經啦！其間，兩女喺附近商場一間日牌平價服裝店shopping，Anjay快手買咗袋BB衫，再同好友行去維園嘅巴士站等車返家。


接力湊女
搭幾個站嘅Anjay和好友坐下層繼續傾。車程唔使十分鐘，Anjay keep住發言，未幾佢喺炮台山先行落車，步行返寓所。見人妻似乎較啱時間，同老公約定返屋企接力湊女，在大廈門口與剛出門嘅丈夫恩愛攬攬又拖手仔，表現得難捨難離。而愛妻號黃頌祈見到老婆仔撒嬌，亦一直冧笑，模範夫婦甜到漏！