潘紹聰指冤鬼最得人驚 惠英紅收藏陪葬品惹嚇破膽經歷

「鬼王」潘紹聰與「鬼后」惠英紅坐鎮驚慄片《綁靈》，二人宣傳這片不忘自爆撞鬼經歷。
潘兆聰主持網台節目《恐怖在線》，曾經帶團到泰國祈福，隨團一位女士突然被靈體上身，「發狂時嘅力量係要4、5個男人先捉得住，我就係其中一個，親身遇過真係好驚好真實。」作為「鬼王」其實都會有害怕的鬼，潘紹聰笑說：「最怕梗係窮鬼啦，一個人無錢可能乜都做得出。」隨後他認真表示：「冤鬼係最得人驚，就好似一啲涉及嬰靈嘅個案，佢哋嘅怨念係好深，可能過咗幾千年都唔會散，只可以等到佢哋嘅怨念解除。」

影后惠英紅拍過無數電影作品，參演的《心魔》、《血觀音》、《彊屍》等懸疑驚悚電影都為她奪得不少殊榮，紅姐絕對配得上「鬼后」的稱號。很多人說拍戲易撞鬼，紅姐霸氣自言見過太多，習以為常：「有次拍戲途中瞓晏覺，有好多細路嘅靈體喺附近擾攘，我就話乖啦畀阿姨瞓陣啦，我醒返發現得我一個夠膽瞓，其他人都驚到走晒。」
紅姐更分享一個奇怪嗜好，惹來一個嚇破膽的經歷。她說：「我之前好鍾意收藏真嘅陪葬品，有次酒店瞓覺途中，見到天花板有好多個大嬸嘅頭圍住我，全部都係古代穿著，講北京腔係咁鬧我，我係咁唸經先無事。」事後紅姐睡醒才發覺，原來當時枱上擺放著古代首飾盒的陪葬品。