古仔任壓軸嘉賓 鄭秀文:唔請佢就好似大便後無廁紙

鄭秀文（Sammi）今晚尾場演唱會破格請男嘉賓，亦是電影上的好拍擋古天樂，二人合唱《默契》。

Sammi以「最受歡迎男歌手」古天樂介紹古仔出場，穿粉紅外套配黑褲的古仔應聲亮相，難得古仔獻唱，引得全場狂叫近一分鐘，相當哄動。合唱過後，Sammi也笑指現古仔尤如踩場（反應超熱烈），又鬼馬說：「如果大家記得，我係經常請古仔做嘉賓，若然無請他，就像大完便無廁紙，收唔到科！上次（慈善晚宴）肚痾，都係多得古仔幫手。」古仔也搞笑附和：「上次肚痾，今次大便，好完美吖！」繼而又取笑Sammi所穿的超短褲道：「你條褲成個蘿柚突哂出來呀！」Sammi反笑指古仔好保守，之後返入後台讓古仔獨唱。

古仔獨唱《男朋友》，雖然唱功忠於自我保持水準，不過就邊唱邊跟觀眾握手，表現親切，打破平日的cool爆形象。

今晚另一位表演男嘉賓是王嘉爾（Jackson），亦是首度同台唱出二人的合唱歌《Creo en Mi》，同樣令台下起哄，二人相擁打招呼，再搭人膊互送高帽。