尾場破戒屢犯規公然偷食 姜濤不滿表現搖頭嘆氣

男團Mirror最具人氣成員姜濤相隔兩星期，昨晚舉行他首個個人音樂會尾場，姜濤這夜「狂犯規」，既破例狂拎台下粉絲手機自拍，怕肥的他又犯禁在台食漢堡包滿足一番。
音樂會繼續有梁業（肥仔）及盧瀚霆（Anson Lo）擔任嘉賓。姜濤自爆雖然認了肥仔做師傅，但卻未有正式拜師，所以希望能在尾場進行儀式，怎料肥仔說：「你要跪我同斟茶畀我喎！」此話一出，姜濤也就立即拿了台上自用的開聲茶，跪低獻茶，之後姜濤更笑言：「以後跳得好唔好都靠晒肥仔喇！」至於過去兩場曾爆姜濤秘密的Anson Lo，今場他表示要多謝對方，更說：「大家可能覺得姜濤好靜，但佢喺台上嘅堅持同埋固執，都啟發同影響到我，同步亦令到Mirror各人想努力做好，所以我想借今晚多謝姜濤。」

在過去兩場一直被經理人花姐嚴禁太近距離接觸粉絲的姜濤，趁花姐昨晚在外地工作未有現身，即多次破例踎低拎粉絲的手機在台上自拍，結果引來粉絲尖叫不斷。另外，姜濤又自加在台上吃漢堡包環節，完騷後表示：「我噚晚瞓咗4次，5點至瞓到，餓到瞓唔到，所以我半夜打畀導演，想要在台上加插一part食漢堡包的環節。」姜濤更笑言導演想爆頭如何加插，但他餓到好堅持，苦苦要求導演。由於已經兩個多月未有吃過漢堡包，所以即使助手拿來的漢堡包已攤放了數小時，怕肥的姜濤都即時在台上大啖吃了幾口，更頻說好好味，並露出猶如小朋友的燦爛笑容呢！

其實相隔了兩星期才舉行尾場，姜濤在期間曾掉以輕心吃得太多，在頭一星期更迅速增磅2kg，被隊友指他「乜肥得咁快」，姜濤聽到即非常擔心，於是在第二個星期便極速減肥。他騷後透露減肥妙法道：「我嘅減肥妙法就係打邊爐！不過就只用清水白烚，咁就既可以打邊爐過口癮，但同時又可以快速瘦身。」

姜濤又透露來到第三場，對於拿捏觀眾反應有了經驗，整個人是輕鬆了，但表現卻未如理想，連番搖頭嘆氣，特別是在音準及舞步上都有做得不好的地方，更感慨道：「過去唔理幾多人，都見到花姐一對眼望住自己，但今晚佢係雲頂工作，可能咁無咗啲壓力，唉！希望花姐下次能夠喺度，我自己都要繼續努力！」