郭嘉駿指與劉錫賢合作有壓力 爆對方舊樓拍攝時介紹「特色架步」

ERROR成員何啟華（Dee） 、郭嘉駿（193）及MIRROR成員李駿傑（Jeremy）日前拍攝ViuTV全新處境喜劇《娛樂風雲》時表示，3人自參與《全民造星》認識，默契十足，而且故事又承接《做演藝嘅》，所以一埋位就已能投入角色。

193及Jeremy老友鬼鬼，即使Jeremy經常被193言語攻擊都冇詐型。193表示：「拍處境劇需要用好多時間，經理人花姐都開始有微言，因為我地除咗拍劇，仲有《花姐ERROR遊2》未拍晒，經理人度期度到爆炸！你估我地好似Jeremy咁咩，我地組合得4個人，唔見一個就好大鑊，MIRROR有12個人，佢唔見咗都未必覺架！」

193及Jeremy表示與劉錫賢合作感壓力，193仲爆Jeremy扮勤力：「我見Jeremy份劇本用螢光筆間晒對白，我以為佢做晒功課好勤力啦，搞到我都有壓力學佢咁準備，點知一埋位佢都係甩對白，原來只係扮勤力。好在團隊好好，NG都唔會罵我地。而賢哥亦好大方，見我地新人NG冇所謂，笑笑口再拍過。」

193又爆料於深水埗舊樓拍攝時，劉錫賢介紹該區「特色架步」：「我地發現呢度好多單位都貼哂反光膠紙，我地就問賢哥，佢話自己細個時有研究。」劉錫賢則否認：「唔係呀，千萬唔好心邪！來到深水埗呢度太多美食，我一半身材來自呢一區，之不過見慣見熟先知咩架步。」