組「媽妹祥祥」扮學生哥雲頂開個唱爆場 祥仔爆肥媽死穴：有樣嘢佢最驚

肥媽（Maria Cordero）、黑妹（李麗霞）、阮兆祥及黎耀祥，6月初組成「媽妹祥祥」組合，到馬來西亞雲頂舉行演唱會，全場爆滿。四人施展渾身解數，先後以「逆齡俏學生」、「情歌王子」、「筷子姊妹花」等勁爆造型，唱盡70-90年代英文經典金曲以及電視劇主題曲，令現場逾5000名觀眾熱血沸騰。擅於搞氣氛的四人期後更發揮親民本色，走落台與觀眾近距離接觸，與觀眾握手兼被集郵，成功將現場氣氛再次推向高潮。

問到加埋超過200歲的4人，為何突然興起齊齊挑戰扮演超齡「學生哥」及「學生妹」時，祥師兄笑言：「其實都唔係好特別啫，我同黎耀祥都係飾演番自己，反而肥媽同黑妹姐嘅學生妹造型真係令我哋眼前一亮，辣到不得了，可以話係SPICY LADIES！」愈講愈興奮的祥仔，更大爆肥媽「死穴」：「大家咪睇肥媽平時大大聲，好似乜都冇有怕咁，其實唔係架，佢有樣嘢好怕嘅，不過唔係佢老公，而係榴槤呀！今次我哋呢個雲頂SHOW，有朋友拎咗啲貓山王嚟同我哋打氣，肥媽一聽到榴槤兩個字即走夾唔抖，真係畀佢笑死。」祥仔又笑言肥媽的老公此次亦有隨行，並大爆「教女人最緊要姣」的肥媽，私底下對老公都係相當「姣」，十分搞笑。