【倒數3日開騷】減逾20磅操出胸肌 蘇永康派定心丸：唔會除衫嚇人

蘇永康（William）正為今個周五、六（6月21、22日）於紅館舉行的演唱會緊密排練，倒數3日便開騷。
首次與過百位來自世界各地樂手合作，在密室排練的William直言非常興奮及開心，聽到一首首重新編曲的首本名曲，令他感動不矣，說：「真係諗唔到一聽音樂起，竟然令我找回當初為熱愛唱歌，熱愛音樂的那份初心，有幾首歌真係個心都震埋，非常震憾，迫不及待想同大家分享今次成果。」
為了演唱會，William亦積極減肥修身，日夜操練之下減了二十多磅，成個人瘦了一個碼，「真係練到胸肌都有埋，不過大家唔使擔心，我唔會唔著衫出來嚇人，哈哈。其實練身都係對自己的健康負責任，希望有最好的體能上場，不要生病咁先可以發揮到最狀態。近呢兩個星期，連食嘢著衫都好小心，盡量唔畀自己有感冒的危險啦，因為依家啲感冒菌大家都知啦，好耐都唔好。唔知係咪keep住做運動，所以身體真係好咗，以前每次演唱會，個人緊張，壓力一來，我口唇邊就一定出晒疱疹二形，一粒二粒，但今次又一粒都冇出喎。我係二形，唔係一形呀下，大家咪誤會。」
問到剛過去的父親節如何度過？William話成個父親節做足24小時湊仔公，「老婆出差唔喺香港，剩番我一個，邊個同我慶祝喎，我咪24小時喺屋企湊仔囉，唔係邊個幫我睇住佢，父親節我估要等到我個仔再過多兩年啦，識得做下手工仔，我估我先開始真正得到個仔送禮物畀我啦。」