早知契女謝婷婷生B？ 汪明荃：都有啲意外驚喜

汪明荃（阿姐）與森美及蘇永康等為遊戲節目《娛樂大家》錄影，梳了「春麗頭」配上黃色裙的阿姐，配合造型擺出多個嬌俏甫士。

談到契女謝婷婷前日突然在社交平台宣佈已為人母，誕下了一名B女，榮升契婆的阿姐說：「婷婷有話畀我知，但冇畀相我睇，都想睇吓BB，睇佢幾時返嚟啦，都好耐冇見佢，因為佢唔喺香港。（你有幾耐冇見婷婷？）大家都話一年冇見佢，我都係差唔多時間啦。（欣宜最近見過婷婷？）佢哋都老友。」

問對婷婷生B是否早已知情？她坦言比大家早一點時間得知：「之前已經知道，都有啲意外驚喜，不過始終咁大個，佢一向都有拍拖。（但婷婷冇公開戀情？） 呢啲好私人，唔使公開啦。( 你比謝賢更早知道？) 我同契女幾close，後生女處理有自己一套，都恭喜佢。」問到會送什麼禮物給契孫女？阿姐稱還未想到，或按傳統送金鏈或金器。