鞏俐嫁法國作曲家 黃秋生憶二人80年代「淵源」

53歲鞏俐被爆再婚70歲法國著名作曲家Jean-Michel Jarre後，黃秋生於臉書回憶原來二人早於80年代，因為秋生的關係已有著「淵源」，但其實又與他倆沒直接關係…實在太玄了！
秋生留言：「（有段故）佢哋同我冇關，不過佢兩個同我一個旅程有關。好耐之前演藝學生（我當時仲係學生）去北京交流時鞏小姐嚟接機，（佢仲係學生，而且係高材生）。我哋班男生睇到眼凸。佢鬼火咁靚。不過可惜只安排招代老師，晚會時只同老師跳舞。（當時好單純，好正經嘅世界。）八十年代內地仲未有K末有Disco，我帶咗佢呢個老公嘅錄音帶上去，當時住舊紫玉飯店，夜晚似住飛鵝山，乜都冇。不過有一間房，有一部錄音機，有彩燈（彩色燈膽）。同一個看場阿叔。我哋成班同學夜晚冇嘢做就去嗰間房開party，放阿法國電子樂大師嘅音樂。唔夠十分鐘。音樂停咗。阿叔停機，我問佢乜事。佢一臉驚恐咁同我講，呢啲唔准放，我問點解？佢重覆話唔准放。於是我哋冇癮收皮，返房講鬼故。當年一個重點培育，一個唔准放。而家走埋一齊。我覺得人生好神奇。」