亨利拆局│練馬師王吼告東尼

繼羅富全早前在泥地夜賽三W封王，剛戰輪到方嘉柏發威勁奪五十四分，經一輪沉寂之後，上述兩倉漸見起色，看來踏入賽期中後階段，幾個大馬房都要重新留意。其中東廄發霉多時，對上一次封王已是二月十二日，今日適逢連場大賽，是時候發奮圖強。

第三場「電路七號」減分過晒龍，五歲馬無理由咁快打柴，強配蘇兆輝似有計。第五場「綫路菁英」體重逾千二磅，應付沙田並無不可，排一檔希望有利可圖。第六場「加州得力」賽績優異，不過後勁馬跑谷草一千始終吃虧，移師沙田未知效果如何，只知佢季內六戰次次衝得勁，今次步速夠快就有機。第九場「加州星球」難得強手盡去，今次即使多負五磅亦讓得起，一放迄終無難度。同場「美麗同享」踏入六歲停滯不前，但今次曾試大閘催谷，明顯有備而臨，可與廄侶串Q。

第十場「綫路之星」上仗放頭賺終極慢步速，但末段時間造得靚，當銳馬繼續有計。同場「中華盛景」勝在忠心穩定，三四重彩要長期拖住。第十一場「加州一寶」初跑千四有待證明，但近仗衝刺偏向均速，加程正合時宜，今次獨忌排十一檔，早段際遇要講彩數。

目標：告東尼

賠率：3.75

立即下載 | 全新《星島頭條》APP : https://bit.ly/3yLrgYZ