Chok王心得｜文家良 留任總有因

文家良得以留任多一季，像他這樣獲續牌的例子真前所未見。筆者無意討論是否恰當，畢竟馬會打開門口做生意，瓣瓣都要平衡，事事顧全大局，突然放寬梗有充分理由。
其實，何良與鄭俊偉已連續兩季未達標，假如今季贏唔夠數，二人都提早拜拜，變相騰出兩個空缺，加上苗禮德近來似乎抱半放棄態度，感覺似有還無，如果一下子失去三位倉主而換上三位新人，未必恰當。讓文家良留任一季，起碼係熟悉面孔。
講開練馬師，一直唔多明白點解要鎖死廿零個倉口這數目。依家馬季延長，現役馬匹唔多夠用，久唔久出現冷場，為何不增加三幾個馬房數目，藉此幫手撐場？我自作聰明咁諗，本地薑唔會無人才，海外亦不會得一個黎昭昇，招攬多幾位練馬師無壞。當然我明白馬會選秀的條件相當嚴謹，不會隨隨便便搵普通人，無番咁上下，肯定過唔到關。

洪禮賢

立即下載 | 全新《星島頭條》APP : https://bit.ly/3yLrgYZ