亨利拆局│練馬師王吼方嘉柏

踏入十二月之後，谷草賽事例牌編跑九場，不過練馬師王的勝出分數卻愈來愈低，由上月十四日計起次次遞減，甚至上周三沈集成並無頭馬交出，奪兩亞三季共廿四分，已經足夠登上寶座。表面睇封王難度愈趨降低，實際上代表各倉競爭愈趨激烈。

回看今期賽事，我認為告東尼和方嘉柏都有機會起孖，其中後者在谷草成績較佳，自然值得睇高一綫。

第六場「精彩非凡」苦戰至第三十回合，終於在上仗取得處女勝利，無疑末段走大外疊賺有利跑綫，再伸算對手實力，本身贏馬水準未必高，不過季內六戰獲一贏兩位，轉六歲後表現穩定，而且性賦忠心例追一段，希望今次繼續賺。

第一場「天分高」上仗沿途三疊望空似遊馬河，輸三乘許談不上好，卻比之前有進步，今次排一檔有得諗。第二場「赤子雄心」最大顧慮是鍾易禮能否勝任，不過前置馬較容易發揮，論馬有三甲機會。第三場「駿爵士」上仗早段居後太被動，今次由大外檔變一檔，由蟲變龍有得解釋。第八場「黑桃火箭」上季603場次跑同程，當晚後追稍吃虧亦追近，現較當時低七分，強配布文更添競爭力。

目標：方嘉柏

賠率：7.0

立即下載 | 全新《星島頭條》APP : https://bit.ly/3yLrgYZ