果然友大勇再贏

蔡約翰練馬功力無出其右，而他練馬並非用針藥催谷，所用的飼料亦是平常的飼料，蔡廄馬能交出好表現，純粹因操足操夠，並且配合相應之部署。相對不少練馬師，往往太想贏因而安排唞夠出擊，然而結果往往適得其反。

第八場第四班一四○○米：「果然友」今季密密上陣好少積極備戰，除了首戰之外，其後連續五仗每次賽前頂多跳一課，有時更未有快跳。前仗此駒唞一個月再上戰陣，練者突然變得緊張起來，安排馬匹跳了三課，並罕見地有拍跳考驗，最終果然能交出勝仗，仲要改變跑法跟前，彈甩大勝，鋒芒畢露。

搵到致勝竅門，以為上仗「果然友」會繼續跟前，然而排十二檔，莫雷拉選擇留番住跑，難得未有用最佳跑法，依然後追入位，確認此駒的狀態踏上最佳時候。今仗賽前見「果然友」繼續有快跳考驗，仲要跳夠三課，比起近兩仗更積極，狀態大勇體力充沛之馬，可期再贏一場。

第九場第三班一六○○米：「真勝者」今季傷瘉得以多操多跑，大前仗展現出其真面目，轉彎兜出大外檔後上輕勝。接戰此駒在國際賽日再建一功，該仗直路初見其一度受困，之後望空在窄位衝毫無懼色，依然肯衝肯拼。上仗元旦日「真勝者」再跑，唞得唔夠令人有點戒心，最弊是孭頂磅兼沿途蝕位，亦因為以上種種只屈居亞席，事後睇番頭馬「駿益善」再出受困差點再贏，該仗「真勝者」屈居亞軍雖敗猶榮。

今次「真勝者」唞番上陣必可發揮最強威力，前速慢且次次走蝕位，增程千六必合進取，再看廄侶「足金好球」也讓路就之，更顯得來勢洶洶。