阿碌開咪｜快活谷第一擊

開鑼日，本欄貼士中規中矩，符碌又中！

凡小弟在此畀的，自己一定買，最少十蚊雞一注。

以此計，開季第一日，若大家照跟，利潤應為七百七十元，夠「豪華晚餐」了！

雖然「錶之未來」冇晒影，但四班一千米就命中Q、PQ及二重彩。「威妙星」搭「嘉應精神」全中，派九百七十元，減去全日二百元本，肥豬仔矣。

新設的「練馬師王」，由馬會做莊，與馬迷對賭，暫時睇，玩唔過，因賠率與風險不成正比！例如勝出的沈集成，對，是有機會，但賠率低至四倍，唔夠買驚風散！亦顯示馬會食水太深！暫時只宜作參考，不宜落注。

點解可作參考？正因操盤手對全日局勢睇通睇透，絕對掌握邊個有機會、邊個冇機會。所以，睇佢點排「練馬師王」冷熱，就知道邊啲練馬師當日唔會出擊，旗下馬匹可以飛起！

例如本來屬強中強的去屆冠軍羅富全、「神仙級」的蔡約翰及呂健威等，排位甚低，即操盤手認為幾個馬房唔會去，果然全中！

尤其蔡約翰，離晒譜，全熱門「美麗笑聲」簡直夢遊馬場！小弟遵從操盤手「指示」，慳返唔少！

今季第一擊，可喜為見到潘頓重拾冠軍鬥志及風采，希望一直「虎頭」下去，勿變蛇尾。

全日最令人氣憤，當然是經常忽龍忽蟲的巴度。當日佢就玩唔見人，跑十場，影都冇。尤其「必長勝」及「美麗笑聲」，後者輸到馬迷絕冇笑聲，只有媽媽聲。不過，呢丁友孭完後，又會突然有日開「忽然變龍」，仲要殺冷馬，大家目及 實！

今晚快活谷第一戰，睇布陣，文希韋沈廄繼續踩盡油，望季初先放離。當然，潘頓也要場場研究，跑道專家也！

今晚提供：「怪獸奇兵」、「想見你」、「喜駿之星」、「勇眼光」及「贏盡天下」。

以上各匹，皆途程專家，明刀明槍操好，試閘十分出色，毫無需要整蠱做怪玩馬迷。故此，就算熱也可照捧也。

希望快活谷今季第一擊也「符碌」命中！

曾智華

阿碌開咪

編按原題為「 符碌利潤770元」