阿碌開咪｜下跪奉茶有咩好拗？

香港真好玩，日日有可以全城熱烈討論的話題（除咗關乎國家安全！），大有大拗，小有小講。

上周整單福建中學附屬學校開學的「孝道禮」，嘩，立即似大型彩彈爆發！因為提倡學生向父母下跪奉茶、揼骨、剪指甲，結果被「越洲飛彈」式轟炸，指該校搞埋啲咁野，鼓勵迂腐及形式主義，對「孝」的理解有嚴重偏差。

終於搞到校長徐區懿華要頻頻飛撲而出，猛咁解畫，躋身新聞曝光人物，日日講，講到成口泡。

小弟不想參與辯論，只想講講自身經驗。

每一代有每一代的價值觀。我的上一代，社會強調男主外，女主內，整頭家經濟由一家之主孭起，點辛苦都要咬牙頂，因為應該嘅。加上大男人主義盛行（如今睇當然唔啱！），不少家庭皆如是，丈夫日出而作，日入回家，攰到成隻狗時（其實主婦做足整日家務，又煮飯洗衫燙衫洗碗抹屋……一樣攰到成隻乜咁！），主婦就會自動預備熱毛巾及拖鞋。

到食完飯，洗晒碗。主婦仍要替夫家揼骨，直至對方呼呼入睡，再巡巡有乜未做，若有，做妥才輕輕上牀。翌日丈夫未起牀，又要雞啼咁早準備好早餐，畀全家食。

故此小弟童年開始，已經深感老媽子的偉大。咁辛苦，從冇聽佢呻過一聲！

作為子女又如何？我的一代，替父親揼骨，乃正常的分內事。深深記得幾歲開始就要做，當時小手皮膚柔嫩，揼落父親毛茸茸的腳瓜，下下拮手，真真唔易頂㗎。不過，當年覺得理所當然要做，從未問過任何人點解如此。

講到下跪奉茶，我一代已開始只結婚才做，因再冇人要求。事實自己亦覺唔多自然，阿女阿仔你哋跪乜鬼吖，起身啦！

剪指甲，就絕對閒事。老媽子在護老院日子，能替佢剪，乃一種福氣，基本的親子關係矣，絕不值得強調。

總結，若大家覺得「福建」做法有偏見，自由社會，你咪理囉，佢又冇叫你做。事實若學生與家長皆享受，關你鬼事咩！

曾智華

阿碌開咪

編按原題「跪低奉茶大辯論」