阿碌開咪｜應該收咗工才頒

上周五早上，如常撞入茶記，隔籬枱已有三位粗豪的士大哥在開壇，攤開張《星島日報》在枱面，你一言、我一語踴躍發言。我行過瞄一瞄，咦……原來睇緊全版廣告——「熱烈祝賀港區省級政協委員聯誼會成員榮獲2022年香港特區政府勳銜」。　

肥佬文：「哇哇，犀飛利啊，一野掃咗五十幾個勳銜，仲有三個大紫荊，真係唔野少。其實，點先可以做到政協委員的呢？大口強。」

大口強：「我知就唔使揸的士啦，懵佬！不過，今年張名單好過癮，七個大紫荊之中，有三個唔知點選出嘅，騎騎，佢哋都攞到，我都應該攞到噃（不停奸笑）。你話係咪呀高佬華？」

高佬華：「求求其其啦。我哋無權無勢，勳章又唔係直選嘅，當然邊個有權邊個話事啦。啲人都廢廢哋嘅，成日揶揄派『荷蘭水蓋』為『政治酬庸』，唉，真係新嚟嘅，你估如今才如此咩？以前港英時代咪又係咁，你試下同港督唔Friend吖，橡筋箍都唔頒畀你呀。有權點解咁過癮？正是我鍾意做乜就做乜，勳章畀邊個就邊個！你張竹君醫生三年來做到死死下殘晒，民望又高，不過，本特首唔喜歡畀你就唔畀，吹乒乓乎？」

肥佬文：「（指住專欄「大棋盤」講）呢呢，星島個杜良謀就講得啱嘞，引述部分建制派建議，高官應該離任始獲授勳。大佬，睇睇個名單，不少仍為現屆官員，包括特首，又有行政會議成員。佢哋仍坐緊官位，有權有責，使乜鬼表揚喎。理應收咗工，下台卸任嘞，先睇睇功績，再決定頒勳銜嘛。如今太過有『你醒我，我醒你』的圍威喂感覺。哈，難得連一向聽話的建制派都覺得唔妥，想建議改例噃。」

班的士大哥雖打體力勞動工，但日日坐車內聽新聞，對時事分析能力絕對不弱，我每朝聽，發覺佢哋意見經常有料到。對小弟來講，也提供不少早晨娛樂。

不過，咁嘈，好惡頂，幸而佢哋個《城市論壇》每朝只三十分鐘，永冇拖長，啱啱好就收檔。

曾智華

阿碌開咪