阿碌開咪

大國內外玩野，台灣嚇到腳震兼陀陀擰。

正當俄烏戰爭仍屬全球注視點之際，突然中美出現新話題，傳媒焦點又Shift矣。

拜登擺明有求於中國，故邀請習近平上周四直接網上對話，究竟想點？內容將陸續曝光。通常兩國最高領袖官式對談前，希望傾掂的事項，必定晨早已通過旗下外交官員摸底，以免真正接觸時得個桔。總之，對話一定比不對話好，希望可以稍減中美間的緊張狀態。

不過，玩政治，爾虞我詐，純講國家或己方利益，冇乜道義可言。故此，蠱惑招可能層出不窮。陰謀論觀之，此時美國三號人物眾議院議長佩洛西放風訪問台灣，絕對可能是替「拜習」上周對話前，為美國爭取談判棋子——嗱，你想佩嬸唔去台灣？得，就咁咁賣我帳啦！

是否如此？冇人知，但有可能。總之，好似幾個月前一樣，佩嬸臨時縮沙唔去台灣容乜易，公開話：「哎呀，PositiveO添！」就搞掂。

同理，嚇到腳軟的民進黨，也試過同一招，主席蔡英文也是用染疫做藉口，拒絕接待「政治敏感」外賓！

美國佬玩政治，無所不用其極，國內兩黨也如是，就快中期選舉，有意參選下屆總統者，當然摩拳擦掌，爭取任何機會搶籌碼。

共和黨方面，暫時有三隻馬跑，包括前總統特朗普、副總統彭斯及前國務卿蓬佩奧，三個分量都唔簡單，公開發言，勢頭全部比口窒窒的拜登省鏡。

最攻於心計的，當然為蓬佩奧，見到佩洛西可能打台灣牌為民主黨爭分，立即抽水，公開揚言百分百支持佩嬸訪台，並聲稱願意相陪。

呢一招，擺明係睇死你去唔成，夾到你騎虎難下，尷尷尬尬！

中國則早清楚表態，絕不容許及容忍佩嬸官式訪台，怒稱決不會坐視不管，戰鬥格！

睇個款，佩洛西應該去唔成嘞，因目前政治環境，怎看也不應引爆咁大場政治火災也，博乜？

中國勝在對此事只得一個口徑，但美國則人多口雜，睇佢哋自己點收科嘞。　

曾智華

 

阿碌開咪