阿碌開咪｜快搞「震腦俱樂部」

任何一家公司、一個機構、一個城市、一個國家，要發展，要前進，其中一項必備元素——創意。不過，並非口噏噏封個官做「創意XX局」就等於有，必定要由上而下，由下而上，皆知道乜叫創新思維。

小弟做咗三十幾年公務員，絕對清楚官場文化，多數唔想孭，怕瀨野。舉世皆如此，做官，一定先自保，反正做又三十六，唔做又三十六，你多多事試呢樣、試嗰樣，出咗事上司會唔會攬你？官場「老是佛」上司最叻劃清界綫。因個個就快夠鐘咬糧，又點會喜歡「搞搞震冇幫襯」下屬？

當年曾蔭權做特首，一再強調公務員要——Think Out of The Box！仲出埋MEMO指示。

不過，一去到各大部門，小弟就聽到「雜音」：「喂，處長支唔支持先？Out of The Box之後領野點搞？畀老細揼時搵『煲呔』申訴乎？」

好嘞，如今新政府開波，會否大刀闊斧改變層層官僚自保文化呢？且看超哥了。

前晚與一退休頂級高官T叔晚飯，佢最支持創意，在任時已經常請具反斗思維的年輕IT人飲酒亂噏「震腦」（Brain Storm）。如今，T叔雖已退下，也年過七十，但腦筋仍非常靈活，創意澎湃，例如認為：「港珠澳大橋乃最佳無人駕駛實驗場。因一條直路，唔使又停又開，尤其疫情時，可以防感染而運送大量貨物，幾正？如今中國的電動車技術，已去到世界頂級，唔用，實在太浪費。條橋也如是，為乜唔用盡？」

單單講一個意念，已知T叔對港人港事仍非常上心，可惜已經不在位矣。

小弟同佢有個共同概念。新政府應立即搞個「腦震盪俱樂部」（類似中央政策組），網羅腦筋靈活創意澎湃年輕專業人，齊齊在無拘無束無官方身分下，揸杯啤酒任噏，就改善香港出謀獻策。佢哋可以齋講唔使做，冇心理包袱下，必定爆出N咁多靚「橋」，慢慢可逐一變成新思維政策。

曾智華

阿碌開咪