阿碌開咪｜嚴打「亂咁踩」

上周老友M向我出示一張「牛肉乾」，抄的時間為早上七點十分，位置是新蒲崗五芳街。你一定話：「嘩，阿Sir真係好勤力噃！」

勤力，不是無緣無故的。乃因政府高層定下「死令」，今個財政年度要抄三百六十八萬張，即每日過萬，而預計呢方面庫房收益十一點七億元。

做過政府者皆知，官場慣例，使錢，財政年度頭會慳住慳住，但一到快年結，就要「花得幾多得幾多」，因若使唔晒，下年會畀人減預算也。

相反，抄牌又如何？為免無法Meet Target，所以，財政年度頭必定會先去盡。若到年尾，見就快到十一億元，咁就鬆啲手，乞人憎工作也。故此呢幾個月乃派牛肉乾的瘋狂期，各位車主自己執生，任何時間都會中招，包括在凌晨。

你問：「有冇咁誇張呀？」

誇張？周一凌晨，正正有隊馬鞍山分區警員，在馬料水科學園路展開代號「朝陽」行動，目標有兩個：第一，票控附近所有違例泊車（誓要盡快「豬籠入水」完成指標）；第二，打擊非法使用電動可移動工具（即電動單車、滑板、風火輪……）

點解凌晨出動？因班玩友多數凌晨犯法也。呢類電動可移動工具，小弟住的何文田、土瓜灣一帶亦常見。騎單車的，外形多為大嬸款。而玩滑板或風火輪，則主要是年輕人，不少在日間亦肆無忌憚在飛馳，奇在從未見有交通警拘捕。

間中呢班「亂咁踩」明顯在送外賣，相當危險。我曾試過駕駛途中被一架電動單車胡亂切綫，幾乎出事，班友認真「累己累人」。

同一晚的「朝陽」行動，正正遇上有個踩電動滑板者，諗住凌晨冇人理，踩呀踩，突見警員，嚇到唔識煞掣，直撞埋去攬炒，兩人一同受傷。後果有幾嚴重？原來相當得人驚，告七條罪，包括「危險駕駛」，若釘中，可能要坐監，問你死未？

任何罪行，你唔告即人人犯。希望重手告此案後，所有電動可移動工具，全部在馬路上消失。

曾智華

阿碌開咪