阿碌開咪｜Dire Straits

睇信學英文！周三早晨，老友香樹輝傳來著名企業家盛智文（Allan Zeman）給林鄭的信，簡直一字一淚道出香港人，包括富豪圈及海外僱員的困境。一矢中的，自然在網上瘋傳。

佢封信對小弟來說，最搶眼為兩個英文字——Dire Straits。起初以為佢憑歌寄意，因Dire Straits為上世紀七十年代非常受歡迎樂隊，一九七七年出道，隨即爆紅，一直至一九九五年。

睇真啲，原來唔係！盛智文只是用Dire Straits來形容整個香港的境況。小弟速速上網查點解，原來直譯是「險峻海峽」，一般用來形容非常艱險的困境！

今次又學到野！

最近接近富豪圈的老友指出，不少富豪非常擔心，部分嬌生慣養的富二代、富三代少爺、小姐，更加震過貓王（老牌形容詞，唔識者可上網睇睇Elvis Presley演唱時對腳點震法，自會領略），紛紛盤算在未來兩個星期，趁未開始全民檢測前，一於Exodus。

呢個字又係盛智文用來形容目前外籍僱員與家人正在發生的情況，即大批大批離開香港，有如當年的《出埃及記》，一發不可收拾。

人之常情，有哪個香港人會願意被安排在竹篙灣、亞博及青衣營隔離十多天？尤其後者，從片段所見，勿講富豪，就算普通人家，也極惡頂。公廁、踎廁、集體沖涼中心。試想像，富貴一族，例如許晉亨、李嘉欣、潘迪生、李澤楷……點頂？

好嘞，若果隔離政策並非一視同仁，咁就更會被指「媚富」，勢必群情洶湧，嘈到拆天。

此外，人人都會挑戰：當強檢驗出Positive時，是否特首、司局長及全部大孖沙，必須接受草根市民同一隔離政策呢？

頭都爆！睇嚟「富豪一族」下周開始的大型遷徙避檢盛況，勢將成為國際新聞，任何高手Spin Doctor，也無從修補特區負面形象。

曾智華

阿碌開咪