阿碌開咪｜「處男」檢測

疫情嚴峻，風聲鶴唳，社交生活全面冚旗，不過，工作仍然要繼續。

正在籌備一個電視節目，快將出世，自然要頻頻開製作會議。由總監到監製到導演到資料搜集，坐埋起碼六至八個，點搞？

當然，第一，人人戴口罩。第二……我拍檔「肥M」最特別，因開會之前，未出家門，老婆大人已有「鐵的指令」，必須遵守，否則……最大懲罰——唔准見孫仔。大家睇政府宣傳都知，今一代長者幾鬼着緊——我要見孫仔！本來唔打疫苗都速速去打。

肥M老婆大人指示：一、口罩要長戴，只限飲水時除低！二、參加會議者，個個都要戴口罩！三、所有與會者，開會前必須先做快速病毒測試。四、回家入門前，肥M要再自做一次病毒測試才准入門。

嘩嘩，好嚴謹啫，小弟開咗幾十年會，都未試過有咁要求。

不過，鬼叫你求肥M上陣咩，於是由總監到……資料搜集，個個「篤鼻」可也。

肥M也照顧周到，正是怕你哋話冇檢測用品，早託醫生女婿大手由歐洲比利時入貨，保證優質，聲明93%準確。

就此小弟的「處男檢測」，就這樣開始了。未做過，有啲擔心，因用支咁鬼長棉花棒「隊」入鼻，會唔會好痛㗎？又會唔會好痕，搞到要猛打噴嚏㗎？一輪擔心之下，都係蕭總監犀利：「大家唔使怕，等我示範！」嘩，恍似熟手技工，「隊」完左邊「隊」右邊。然後將棉花棒浸入小小藥水瓶，攪幾攪，再將藥水倒在化驗器上，等「開啊」，睇睇出乜。

咁好玩，照做可也。「隊」呀「隊」，咦，冇乜唔舒服噃。跟手攪藥水，再倒落化驗器。

哎吔吔，此時，個心突然震一震，十五十六，因……怕……若果出現兩條綫咪死？即係會議要立即告終。然後，返家報衞生署，再先自我隔離，等入營……一邊「胡思亂想」，一邊望住個檢測器開乜。終於——一條綫！「處男檢測」過關，嘩，一天光晒！

曾智華

阿碌開咪