阿碌開咪｜「女強人」Out晒

今時今日，仲有冇香港人會以「女強人」來形容能幹女性的呢？冇！因已經百分百Out晒。

香港在多年鼓吹男女平等主義下，早已真真正正做到咗不論性別，一切只看能力而居的境界。

「女強人」稱號點來的？年輕一輩可能一嚿雲。其實，起源於上世紀七十年代初的電視圈。一眨眼，已五十年了。

當時香港，仍是男性主導社會，女性普遍工作機會略遜。

直至電視業崛起，一個全新又前衞的工種，主事人不分男女，照請，開放公開公平良性競爭。

一旦公平競爭，立時不少超高能力女性，爆發出沖天幹勁。加上，當時膾炙人口電視劇《家變》，描寫一位堅毅專業女性洛琳（汪明荃飾），角色深入民心，橫掃香港，創出百分之九十五收視率（五百萬人收看！）的奇迹。

洛琳這形象，開展當時香港時代女性一片天。走在街上，觸目皆「洛琳頭」，滲透力驚人。

其實，《家變》幕後靈魂，正是三位電視女強人，包括監製梁淑怡、葉潔馨及編劇陳韻文。

此劇若非由女性炮製，根本冇可能創作出洛琳的神韻。真人方面，汪明荃正是個如假包換，五十年不變的堅毅女性，角色簡直度身訂造！

上世紀七十年代出現的女強人，最著名的，都在廣播圈。包括張敏儀、吳慧萍、雲影畦、孫郁標、殷巧兒、俞琤……

今日小弟講起女強人，因上周與三位商界傑出女性晚餐，邊食邊浮起這個形象。當然，冇咁老套講出口，但就帶我走入時光隧道，重溫昔日的一切。

邊三位呢？正是國際家具（日本城）集團主席魏麗霞、太興集團執行董事陳淑芳及PuraPharm（農本方）集團執行董事文綺慧。

三位正是在三個領域中各據一方的傑出女性，旗下管理的業務及人事，絕不簡單。我聽下都覺頭痛！

真㗎，我曾居於歐美城市，但發覺，只得香港絕對公平地提供最大客觀環境給女性發揮。故此，本城最多女強人（弊，又用錯詞????）！

曾智華

 

阿碌開咪