阿碌開咪｜志偉，乜咁快就……

曾志偉經常帶畀人開心，連接受娛樂版獨家專訪，也一樣過癮到震。

　　大大隻字幾條標題——掌管TVB認「蠢」但無悔，曾志偉急搵接班人：愈快離開成功感愈大！

　　正常大機構行政人員，邊會講野咁出位㗎？但佢唔同，藝人出身，擅長搞笑，形象深入民心。若正正經經接受訪問，反令大家唔習慣，難以接受。

　　佢老哥講真講假，只有自己知，但旁邊班老友（N咁多，多過天上星星），一年前真係冇個相信佢能夠正正經經做個大機構行政人員，而又……做得長！因性格命生成，志偉極其喜歡彈性（包括工作及上班），點可能日日朝早八點坐定定，開完一個會又一個會，睇完一個報告又一個報告，簽完一疊文件又一疊文件？

　　但佢今天在TVB的崗位，講得非常俗，真係……「倒瀉屎都關佢事」！以佢咁大開大埋，點頂呀？

　　於是乎一眾百厭星老友就在背後開盤，開乜盤？正是：「大家估估志偉能夠做幾耐，愈長賠率愈高，買定離手喇喂！」

　　終於估佢做一個月唔玩有，三個月也不少，睇半年的佔相當多，至於做上一年就……我又點睇？我買——三年！

　　小弟與志偉同年，大家皆快六十八歲，未來兩年極重要，因為邁向人生一個重要關口——直奔七十也。

　　一到七十，對生命必有另一套諗法，因經已時日無多，若能行得走得，一定會盡做心中想做的事。樣樣都可能會做，但絕對唔想再為搵錢走去捱世界（亦無需要）。

　　志偉出身TVB，唔想母公司衰，故有種使命感，希望搞番好佢，然後才功成身退，所以，未來兩年好重要。

　　搞綜藝節目，完全難唔到佢，因拿手，更何況有王祖藍坐鎮？事實過去大半年已搞出一定成效。唯一考起的是未來日子，能否有令人耳目一新的另類品種節目橫空而出呢？

　　若有，又有口碑，收視又能延續的話，咁到時佢就真係大功告成，可以真正享福去也！

曾智華

阿碌開咪