【阿碌開咪】楊立門兄小小「誤會」

近期積極「清書」，將書展時買回來的老友大作，一一細讀。

讀呀讀，讀到楊立門（Raymond）老哥的《門裏門外—楊立門散文集》（星島雜誌集團出版）。因每篇文章短小精悍，加上觸及Raymond多年官場生涯及對人對事觀察，讀之趣味無窮。

翻呀翻，咦，其中一篇講到某君，昔日喜歡回內地旅遊吃喝，但竟然高調拒絕Fanpage中出現簡體字留言，擺明偏見！

呢個某君，肯定是我，一於對號入座。

首先聲明，我過去日子，長年奔走於大江南北城市，多次拍攝飲食特輯，故此在內地飲食界朋友不少。如今雖因疫情無法回內地，但仍不時有通訊。總之，一通關，衞生有保證後，就會拉埋輝哥殺上去。

人人都強調「愛國愛港」，我都係，但點解會「抗拒」簡體字？

說來話不用長，直指中央！

話說二○一八年十一月開始，小弟在昔日聽眾及讀者要求下，決定開個私人「粉絲頁」（Fanpage），講飲講食講旅遊講跑馬外，也會論及時事政治。

自己在傳媒N年作風一貫，我口講我心，有話直說（相信楊立門兄都係）。自由世界就是如此，大家看法就算不同，理應可以互相尊重、包容。

事實，「粉絲頁」是我個人天地，你唔喜歡，可以唔睇或在其他地方自由抨擊。

但若你留在我的Fanpage，就應守我的「家規」，要求明確簡單：一、不准講粗言穢語；二、不同意我冇問題，但切勿撩交打；三、絕不可搗亂（收錢或自發）。

眾所周知，二○一九年發生大型社會運動，我的「粉絲頁」六月後突然湧現大量用普通話譯成英文的名字，全以簡體字瘋狂亂罵，以及以內地政治鬥爭不講理亂扣帽子方式污蔑。我一睇就知屬「五毛打手」，於是簡單對付，來一個，鎖一個，直至「清零」。結果，成功了，全部瓜直。

不過，楊老兄，我仍有很多寫簡體字的「真正朋友」㗎！

曾智華

 

阿碌開咪