【阿碌開咪】我為乜要捱兩針？

近日，全港市民手機都彈出N次同一訊息，全城奔走相告，係乜？正是——被逼隔離時帶啲乜？最搞笑，小弟收到的，竟不少是來自美加英澳及台灣的親戚朋友及N年冇見的舊同學。

　　可知，移離者幾咁「心在香港」呢！隨時被隔離二十一日的所謂「檢疫監」，在全球香港人心目中，極具「震撼性效果」！

　　百分百真確，小弟朋友中，已不少執定一篋又或起碼半篋必須品，準備隨時「坐監」。

　　事實，又係幾得人驚者。無情情捉你關在一間房二十一天，除擔心染疫外，這種失去自由感覺，哪有日日強調自由大過天的港人可以頂得順？

　　尤其，近日被「收監」者，部分屬頗富裕人士，住開過千方呎豪宅，突然要畀人「話坐就坐」，真係幾得人驚㗎。自己擔心外，有寵物者，又唔知點搞。家中若有行動不便全日要各種藥物照顧又協助大小便洗身者，又未見政府宣布如何安排。所以，過慣「優質生活者」，真係擔心到人都癲！

　　上周四，收到一位頗有知名度老友的MM聲訊息：「碌Sir，唔該你替我伸冤！頂佢頭錘，我正住在某幢要全體檢疫大廈。本來，冇打針的話，心甘命抵嘅。但我同老婆大人早早已打完兩針，仍要坐二十一日『疫監』，呢個係乜野政策？早知打完針同未打針一樣，我就唔冒險聽政府話，急急幫手谷針啦。弊在小弟仲以人辦身分，四出游說老友打針，原來，照樣要收監，點解？近幾日畀各路老友怨死呀！」

　　終於，政府今次反應夠快，聽見「M聲震天」後，立即「從善如流」，彈性處理隔離日子，尤其打咗兩針者，更大大縮短「監期」。其實，接種疫苗既然有效，政府就應提供大量誘因游說市民快打。除毋須坐「檢疫監」、可以出外旅遊……外，最基本，在本港之內，亦應搞到「兩針特區遍地開花」。例如酒樓、戲院、運動場……打咗兩針者，即可擁自由自在感覺。如此，才具吸引力。否則，打嚟做乜？

曾智華

阿碌開咪