星島日報

【阿碌開咪】假如我是財爺

2021-02-24 10:00
財政司司長陳茂波今日公布《財政預算案》,相信此乃回歸後最難設計的一份,因為香港庫房一直「水浸」,從未遇過要花幾千億元抗疫情咁杰撻撻。如今疫情要拖幾耐唔知,所以,必須「留子彈」,全港市民一齊慳慳慳,先捱過危機。

小弟冇權冇勢冇官位,只以一介草民睇法亂噏。期望今次財爺精準少少,唔好再亂派錢!

今日小弟陳茂波上身,講講「假如我是財爺」會點,包括:

一、不再全民派錢,因蹝氣。調查顯示,香港千萬及億萬富豪多不勝數,派錢畀佢哋,儍的嗎?

二、薪俸稅退少啲。有工打的應納多少少稅,協助失業的一群。

三、全港公屋免租抽起。幾百萬公屋居民已長年受政府津貼,不應再「雙重津貼」。大家行過公共屋邨(我日日行),就知內藏幾多富戶,揸靚車。錢,只留來幫真正交不起租的貧困戶。

四、全港寬免差餉抽起,因最大得益者,為最巨無霸地產商。收返正價,庫房立即「豬籠入水」。

五、微調股市印花稅。小弟也是投資者,肯定加少少,冇人會放棄炒股。香港如此多股民,若個個畀多啲,真係「小莫小於水滴,匯成大海汪洋」!

六、長者搭車優惠調整,加至三蚊。不應令年輕納稅人有太大負擔。

七、調高行車證收費。香港實在不必要地有太多私家車,調高年費,尤其貴價車,不會有太多人反對。搭公車實在方便。

八、海底隧道加價。如今舊隧相比東隧及西隧,屬「不合理的廉價」。位置最好,收費最低,不公平外,也令中九龍及灣仔經常大塞車。一於加價,反對聲音仍不會太大。

九、牛肉乾加價。非法泊車三百二十元已多年冇改,阻嚇性作用日比日低,有需要也有空間增加。

十、公務員凍薪。經濟滑落,通脹降低,錢的購買力自然增加,公務員應全體凍薪(長俸的也如是)。

十一、問責官員、行政會議成員及立法會議員,全體減薪兩成。小弟純亂噏,會否中呢?

曾智華

阿碌開咪

最新回應

關鍵字