【阿碌開咪】人山人海換回鄉證

近日碰口碰面老友都會問：「有冇攞BNO？」似乎已成一個潮流。

我又如何？基於真係好「嘟」鍾意香港，乜國籍都冇興趣，一於坐定定唔郁，繼續「享受香港」！

反而疫情就快過去，極之思念全球包括內地美食。得閒無事攞張回鄉證一睇，咦，原來已過期半年，咁……若開關，咪冇得第一時間返內地歎Good Food？當下立即上網睇睇點換證先。

如今乜都講效率、講科技。以前申領回鄉證，煩到震。如今？上網填晒表格，再預約，方便。但點都要親身去兩次——申請證及取證。家住近旺角，就去旺角中旅社啦。但見門口有條人龍，中年阿姐大大聲嗌：「申請證要先影相及填檢疫報告，入大廈內行到尾啦。」

咦……乜唔係中旅社內有得影咩？不過，見人人去，我又去囉。小鋪之內，放低三十蚊。

「除口罩除眼鏡！坐定定望鏡頭！」職員指示。

影完，企在門口等。老闆不停嗌：「上邊有扒手，大家貴重財物放胸前！因會用????刀????袋！」

嘩！講到中旅社賊竇咁款，唔該旺角警區派臥底去掃場！

相片曬出，核核突突（拍到似殭屍！），連檢疫表，再排隊入中旅社。行上二樓，因戴住口罩，呼吸唔暢順，制服女職員好有禮貌講：「阿叔，唔使急，我教你點做啦，全自動化㗎。」

對上一次來領證，邊有咁好服務？社會真是已經進步了。以前的「國產味」，雖從裝修到制服仍非常濃，但起碼冇咗「做又三十六，唔做又三十六」的面口。

做完自助程序，持號碼等埋櫃位，人手對一次資料，確認無誤，再一次面對鏡頭Double Check面容及核對簽名，櫃員效率甚高，兩分鐘完成：「曾先生， 三月五日憑票來自助取證啦！」

相比以前，改善不少，雖人山人海（全部五十歲以上中年人），但流程暢順快捷。

離開時發覺，咦，果然有自助拍照服務，不過，要五十元，貴過商場小鋪四成，食水極深！

曾智華

阿碌開咪