【阿碌開咪】我唔會辭職！

收到無綫電視高層人士變動公告，沒有甚麼驚奇。只肯定將余詠珊調離綜藝節目，以及「接納」其夫婿何哲圖辭職，只是震動的第一步，陸續有來也。

其實TVB這個巨無霸機構的音樂政策大權，落於一對夫婦手中的第一天，小弟已公開指出，咁搞法極之唔妥，等於無記決策層自己埋地雷，相信冇乜邊間制度化的大機構會咁做，因這個安排根本在製造當事人及公司形象陷險境。

點解？無謂畫公仔畫出腸嘞，任何對香港樂壇有少少認識者，必心照！

TVB突然公布曾志偉上場時，記者走訪余詠珊，佢公開宣稱：「我不會辭職！」

呢句令人呆一呆。通常大機構高層行政人員，自己經手炒過/逼走過的員工，一定不少，怎會不知私人機構，邊有空間畀你講「我不會辭職」？

大人大姐，非山窮水盡，當然唔會，亦毋須公開炒你，但卻有一萬種方法，令你愈來愈難堪，終於會頂唔住而自己遞辭職信。某位大機構老闆講過：「唔自己走？權在我手，I'llmakeyourlifemiserableeveryday！」

你試過日日返工畀老闆羞辱或活在惶恐之中嗎？我見過！老闆照支人工，但要求你日日返公司「坐監」，在一個無窗房中罰坐八小時，抽起條筋就召你開會，在其他高層面前省到你一面屁，睇你情緒幾時崩潰。

商業世界，得寵時，享受老闆捧到你上天；失寵時，最明智，即走！

不過，政府機構又唔同。因為上司並非你老闆，糧非由佢出，咁玩法不一樣。政府工，人事有晒制度，冇人可以隻手遮天。下屬可以被上司虐待，但基於上司不得炒下屬，故分分鐘會被下屬玩返轉頭。兼且政府部門高層經常調職，上司下屬關係，通常三年一轉，關係出問題？大家「血戰」或死忍三年，時間好快過。政府內，除問責官員，其他公務員絕對有權公開講：「我唔會辭職！」

曾智華

阿碌開咪