【阿碌開咪】我真的好愛派利是

 

 

新年，當然要派利是。利是，一定要是實物，紅封包，雙手送出，眼神祥和，嘴帶微笑，施與受有Eye Contact。

 

所以，金管局提倡電子利是，我第一個反對，幾大唔制，冇晒氣氛外，冷冰冰，非常不人性化！

 

派利是，我分幾個心態轉變階段。初初成家立室，當然開始派利是。但弊！每月收入不多，而香港電台年輕同事眾多，個個派一封，負擔上好惡頂。當時採取「逃避」，若非被撞正兼面對面恭喜，就一於側側膊唔多覺，慳返。

 

事實當年電台有個紅爆節目主持人，公開聲明：「我係唔會派利是嘅，各位，恭喜我都冇用㗎！」

 

哈，原來咁又得喎，此君並冇因此而變得乞人憎。

 

好嘞，隨着年紀漸長，人比較世故，經濟又轉好，升到中高層，開始覺得派利是是福氣，應該的，更可以趁機會與各部門同事建立和諧關係。到外面，尤其對相熟食肆服務員，更是一年一度的致謝，令人與人之間相處更好，感覺更快樂。真是小小付出，大大收穫。

 

　發展到後來，我更是人人派，追住派。派畀邊個？包括經常去的商場內洗手間的清潔阿叔、居住大廈所有護衛員及清潔阿姐、幫襯開的魚檔菜檔肉檔師傅。至於相熟食肆負責人，更要親身上門拜年派利是，並祝生意興隆。真是禮多人不怪，尤其新年期間，一定要製造喜氣洋洋氣氛。

 

送禮也如是。過年前後，一眾各路老友都會送給我果籃、糕點、糖果……點食得晒？我必定來個「開心大分享」，將所有禮品，送呀送。送畀邊個？準則是送下不送上。

 

即生活條件比我好、收入比我多的，就唔送嘞，因冇需要，也冇乜意義。

 

但生活環境不如自己的，就送送送。親手送，盡快送。見到佢哋收到禮物時的歡欣表情，實在是人生一大快事。

 

不過，送還送，之前一定要查清楚食物狀態，尤其年糕、蘿蔔糕，時興不落防腐劑，隨時會變發霉，若送出去，將會有反效果！

 

阿碌開咪

曾智華