菊梓喬矢言𦧲高層爭唱歌

前「星夢一姐」菊梓喬傳被炎明熹等《聲夢》小花分薄資源致人氣下滑，去年底離巢TVB結束7年賓主關係。昨日，菊梓喬舉行記者會宣布加入恩師何哲圖成立的「星演國際」，獲老闆何哲圖與太太，有線娛樂總經理余詠珊送上鑽石咪，寓意越唱越強。她否認加盟做一姐，努力做新人在歌視多方面發展，笑言就算批踭、𦧲高層都要爭歌唱。

菊梓喬獲眾師兄姐送祝福，她指最大原因是久沒出歌，見到歌迷仍支持她，覺得感動。她受訪時表示已一年多沒出歌所以很不習慣，透露將有不同計劃及新嘗試，至於加盟後何時出歌，她相信老闆會為她揀選最好的歌。新加入的她自認師妹，當笑指她是公司一姐，她即否認：「努力做新人，做細係會好努力。」她當自己是新人，在音樂、劇集及節目多方面發展，坦言若TVB邀請，也會合作。
爭取工作唔知醜
問到為何會繼續跟何哲圖合作？菊梓喬說：「有其他公司搵我，不過出道開始佢幫我很多，係伯樂同恩師，對佢信任，佢從來有嗰句講嗰句，好穩陣。（條件好？）有得返工已經好好，喺TVB好少見大家，藝人需要同大家見面。」她指現時逼老闆一年幫她出4至5首歌，希望搞演唱會，日後努力爭取工作：「拍劇都會自薦，唱劇集歌就會跪求，而家有啲唔知醜。」更笑謂日後就算出批踭、𦧲高層也一定跟師兄姐爭歌唱。
聞吳卓羲即落閘
問到有否拍拖，菊梓喬表示想，不介意姊弟戀，只要合法年齡便可。至於今次加盟有否詢問緋聞男友吳卓羲的意見，菊梓喬即落閘說：「唔知喎，我要做好我自己。冇咩好講，今日係我大喜日子。（有祝福你？）冇人知呢件事，可能人哋冇睇，唔緊要。（好少聯絡？）冇所謂。」